Abafite ubumuga bw'uruhu bagiye koroherezwa kubona amavuta yo kwisiga

Abafite ubumuga bw'uruhu mu Rwanda barabyinira ku rukoma nyuma yaho umukuru w'igihugu asabye inzego bireba kuborohereza kubona amavuta n'ibindi bikoresho birinda uruhu rwabo kwangizwa n'izuba.

Nubwo amwe muri aya mavuta ashobora gukoreshwa na buri wese mu rwego rwo gukingira uruhu rwe ngo rutangirika, harimo amwe muri yo abafite Ubumuga bw'uruhu bakenera umunsi ku wundi kuko abarinda gufatwa na kanseri y'uruhu.

Bamwe mu bafite ubumuga bw'uruhu bakenera byibura amacupa 2 y'aya mavuta buri kwezi, ni ukuvuga amafaranga y'u Rwanda ibihumbi 21. Ni ubushobozi benshi mu bafite ubu bumuga bavuga ko badafite, ibintu birushaho gushyira mu kaga ubuzima bwabo.

Bamwe mu bakora muri Farumasi bemeza ko mu gihe aya mavuta yashyirwa ku rutonde rw'imiti abafite ubumuga bw'uruhu bishyurirwa n'ubwisungane mu kwivuza, mutuelle de santé byagabanya igiciro cyikagera byibura ku mafaranga y'u Rwanda ibihumbi 2.

Kuri ubu mu Rwanda habarurwa abantu bafite ubumuga bw'uruhu basaga 1000 nk’uko bitangazwa n’Inama y'igihugu y'abafite ubumuga.