Abaturage bavuga ko manda y'imyaka 7 iri imbere bayifitemo uruhare rukomeye

Abanyarwanda babarirwa mu byiciro byihariye nk'abagore, urubyiruko n'abafite ubumuga, baravuga ko imyaka irindwi Perezida wa Repubulika Paul Kagame yatorewe izarangwa no kugaragaza mu buryo budasubirwaho ubushobozi bifitemo.

Abatangaza ibi bavuga ko imyaka yabanje by'umwihariko irindwi ishize yaranzwe no gukuraho inkomyi zadindizaga iterambere ryabo no gushyiraho amategeko abaha uruhare mu buzima bwose  bw'igihugu, bityo ngo iyi manda itangiye ikazaba umwanya mwiza wo kugaragariza igihu n'amahanga ko agaciro basubijwe bagakwiye koko.

Mu matora y'umukuru w'igihugu aheruka abagore bari bihariye 54% by'abatora naho urubyiruko rukaba 45%.

I Kinyinya mu mujyi wa Kigali, Nshimyumuremyi Mathusalem waminuje mu bijyanye n'amategeko ntiyacogojwe n' ubumuga bwo kutabona bwamugwiririye mbere yo gutangira amasomo ya Kaminuza.

Yifashishije mudasobwa, kuri we Manda y'imyaka 7 irindwi Perezida wa Repubulika Paul Kagame  izanye  ikibatsi cyiyongera ku bisanzwe byarakorewe Abanyarwanda n'abafite ubumuga by' umwihariko.