Amajyaruguru: Ubuyobozi burasaba abaturage kufatanya mu kurwanya imirire mibi

Ubuyobozi bw'intara y'amajyaruguru, burasaba abaturage ndetse n'inzego z'ibanze zibegereye, gufatanyiriza hamwe kurwanya ikibazo cy'imirire mibi ikigaragara  hirya no hino muri iyi ntara, kuko muri iyi ntara habarurwa abana bagera kuri 30% bagaragaraho kugwingira.

Umubare munini w'abana bagaragaraho kugwingira mu ntara y'amajyaruguru, ni imwe mu mbogamizi zibangamiye imibereho myiza y'abatuye iyi ntara.

Ahanini uku kugwingira ngo gukomoka ku mirire mibi iterwa n'abaturage bagifite imyumvire ikiri hasi ku bijyanye no gutegura indyo yuzuye, isuku nke, kutaboneza urubyaro n'ibindi.

Umuyobozi w'intara y'amajyaruguru Musabyimana Jean Claude avuga ko nyuma yo kubona ko ikibazo cy'igwingira ry'abana ahanini gifatiye ku mirire mibi, bafashe ingamba zo gukura mu nzira mu gihe cya vuba ku bufatanye bw'inzego zose.

Mu nama yahuje ubuyobozi bw'intara y'amajyaruguru, abakora mu nzego zitandukanye zirebana n'ubuzima na Sun Alliance ariryo huriro ry'imiryango ishinzwe kurwanya imirire mibi mu Rwanda, hagaragajwe ko hakiri byinshi bikeneye kongerwamo imbaraga kugira ngo abaturage bo muri iyi ntara bagire ubuzima bwiza.

Butera John Robert Mugabe, Umuyobozi wa Sun Alliance, avuga ko  kuba Leta yarashyizeho politiki nziza zigenga ubuzima bwiza buzira umuze bw'abaturage,  ari inkingi yo kubakiraho ibimaze kugerwaho bikarushaho kujya mbere.