Buri munyarwanda akwiye kugira uruhare mu kurwanya ruswa-Hon Mukabalisa

Perezida w'inteko ishingamategeko umutwe w'abadepite Hon Donatile Mukabalisa aravuga ko buri muturarwanda wese agomba kugira uruhare mu rugamba rwo ku rwanya ruswa igacika burundu mu Rwanda. Ibi yabitangaje mu gitondo cyo kuri uyu wa gatanu ubwo yafunguraga ku mugaragaro inama nyunguranabitekerezo ku guhangana na ruswa, harasuzumwa inzitizi zikigaragara n’ingamba zafatwa.

Ni inama nyunguranabitekerezo yateguwe n'Ihuriro ry’Abagize Inteko Ishinga Amategeko riharanira kurwanya ruswa APNAC, ikaba yitabiriwe n'abadepite, abasenateri, abayobozi mu nzego bwite za Leta n'iz'abikorera ndetse n'imiryango itari iya Leta.

Bisobanurwa ko iyi nama ku kurwanya ruswa iratuma bamenya ahakenewe kongerwa imbaraga kugira ngo abanyarwanda bagere ku ntego bifuza mu  mu cyerekezo igihugu kihaye.

Icyegeranyo cy'umuryango mpuzamahanga urwanya ruswa n'akarengane Transparency International gishyira u Rwanda ku mwanya wa mbere mu muryango wa Afurika y'iburasirazuba mu kurwanya ruswa. Abagize inteko ishingamategeko bavuga ko abayobozi bagomba gukora mu nyungu rusange z'igihugu no mu nyungu z'Abanyarwanda bakorera.