Guinea: Perezida Kagame yitabiriye inama imuhuza na Perezida Condé

Perezida Paul Kagame yageze muri Guinea Conakry mu nama imuhuza hamwe na perezida Alpha Condé wa Guinea ndetse na perezida Idris Déby Itno wa Tchad. Aba bakuru b'ibihugu by'u Rwanda ndetse na Tchad bagiye guhura na perezida condé kuri ubu uyoboye Umuryango wa Afurika yunze Ubumwe (AU), baganira ku mavugurura ari gukorwa kuri uyu muryango kugira ngo ubashe gutanga umusaruro.

Mu nama ya 27 ya AU yabereye mu Rwanda muri Nyakanga 2016, abakuru b’ibihugu bigize uyu muryango basabye Perezida Kagame gushaka uburyo bwo kunoza imikorere y’umuryango, akorana n’impuguke zitandukanye, anoza raporo yagejeje ku nama ya 28 yabereye Addis Ababa muri Ethiopia muri Mutarama 2017.

Icyo gihe abakuru b’ibihugu bashimye akazi yakoze, ibitekerezo yatanze biganirwaho ku buryo burambuye ndetse barabishyigikira, bamusaba ko yakurikirana ishyirwa mu bikorwa ry’impinduka zikenewe mu muryango.

Perezida Kagame yahawe izi nshingano ubwo umuryango wa Afurika yunze ubumwe wari uyobowe na Perezida Idris Deby, ariko muri Mutarama aza gusimburwa na Alpha Condé wa Guinea mu buryo abakuru b’ibihugu bagenda basimburanamo buri mwaka.

Bivuze ko aba bakuru b'ibihugu uko ari batatu bafite umwanya wo kungurana ibitekerezo, aho buri wese afite uruhare mu mpinduka zikenewe ngo AU ibashe kuba umuryango usubiza ibibazo by’Abanyafurika.