Huye: Ishyamba ry'ibisi bya Huye risa nk'irisigaye kwizina

Hashize igihe kirenga umwaka ishyamba ry’ibisi bya Huye ryangizwa ku buryo bukomeye, aho abantu bazwi ku izina ry’ibihazi batemamo ibiti, bagatwikiramo amakara, hakiyongeraho n’ibikorwa by’urugomo bakorera umuntu wese ushaka kubabuza.

Iki kibazo kimaze iminsi gisa n’icyaburiwe umuti cyahagurukije inzego za Gisirikari, Polisi y’igihugu, n’Abayobozi ku nzego z’ibanze.

Mu nama yaguye y’umutekano yabereye mu Karere ka Huye kuri uyu wa Mbere, iki kibazo nicyo cyafashe umwanya munini.

Umuyobozi w’ingabo mu Ntara y’Amajyepfo, Brig Gen Jean Jacques Mupenzi yavuze ko hari bamwe mu bayobozi b’inzego z’ibanze bashyira ingufu nke mu kurangiza iki kibazo no gukingira ikibaba Ibihazi byangiza Ibisi.

Bamwe mu bayobozi b’imidugudu n’utugari bari muri iyi nama bagaragaje ko bafashe ingamba zikomeye zo gukumira no guta muri yombi abangiza Ibisi bya Huye, harimo gukora irondo ku manywa na n’ijoro.

Gusa aba bayobozi bagaragaje imbogamizi bagihura nazo zituma ikibazo kitarangira burundu, zirimo ko abangiza iri shyamba bitwaza intwaro bagakorera urugomo abaje kubakumira.