Ibuka irakangurira abahanzi gukoresha filime bavuga ku amateka ya Jenoside

Abahanzi Nyarwanda by'umwihariko abakora Sinema, bavuga ko biyemeje guhindura amateka mabi yaranze bamwe mu bakoraga uyu mwuga bakoresheje nabi inganzo yabo bakabiba urwango mu banyarwanda muri Jenoside yakorewe Abatutsi. 

Ibihangano bikozwe mu buryo butandukanye, ni kimwe mu bishobora gufasha abantu kubana neza iyo bikubiyemo ubutumwa bwubaka, cyangwa se bigasenya umuryango iyo bikoreshejwe nabi.

Bamwe mu bahanzi bakora mu bijyanye na Sinema, bavuga ko kuba hari bamwe bakoraga uwo mwuga bagize uruhare mu gukangurira abantu gukora Jenoside yakorewe Abatutsi mu Rwanda, ari ikimwaro kuri bo. Gusa bemeza ko biteguye gutanga umusanzu wabo bahindura iyo sura mbi, bagahanga ibyubaka umuryango Nyarwanda.

Nkuranga Egide, Visi Perezida wa mbere wa IBUKA ,Umuryango uharanira inyungu z'abarokotse Jenoside yakorewe Abatutsi, avuga ko nubwo bwose Sinema zivuga kuri jenoside yakorewe Abatutsi zikiri nke, hari icyo zifasha cyane kubazireba,''Film nyinshi zirigisha zitanga ubutumwa budufasha cyane, bufasha abacitse ku icumu , bufasha Abanyarwanda  bugafasha abatuye isi. Iyo hakoreshejwe film abantu bamenya amateka yacu, bamenya Jenoside yakorewe Abatutsi noneho bigatuma na babandi bafite intwaro yo kugira ngo bayihakane bayipfobye bacika intege niko navuga kubera yuko amateka y'ibyabaye aba ashyizwe ahagaragara kandi n'abantu b'abahanga urumva ko ari ikintu kiba gikomeye cyane''

Inama y'igihugu y'abahanzi ivuga ko mu kwezi kwa gatanu uyu mwaka, bateguye  ikiganiro cyaguye bazagirana n'abahanzi Nyarwanda bo mu ngeri zitandukanye, gifite insanganyamatsiko igira iti ''Umuhanzi na Jenoside yakorewe Abatutsi'' aho bazarebera hamwe uburyo umuhanzi yagira uruhare rugaragara mu kubaka u Rwanda ruzira Jenoside n'ingengabitekerezo yayo.