Imihigo y'intore ikwiye gukurikiranwa kugirango umusaruro uboneke--Rucagu

Komisiyo y'Itorero ry'igihugu irimo kureba uburyo hanozwa imikorere y'intore ziba ziri ku rugerero kugira ngo zitange umusaruro uhamye.

Ibi bitekerejwe nyuma y'uko hari ibyiciro bitandukanye by'intore zatojwe indangagaciro na kirazira by'umuco nyarwanda ndetse mu gusoza bagahiga ibyo bazakora bagiye ku rugerero.

Gusa ariko bamwe mu bitabiriye imirimo y'itorero ry'igihugu bavuga ko iyo barangije batongera gukurikiranwa ngo harebwe niba imihigo yabo bayishyira mu bikorwa.

Umuyobozi wa komisiyo y'itorero ry'igihugu Boniface RUCAGU avuga ko hakwiye kunozwa ndetse no gukurikirana imihigo y'intore, ku buryo uko umubare w'abitabira itorero n'abatoza ugenda wiyongera buri mwaka, abe ari nako bitanga umusaruro ku iterambere ry'igihugu.

Kuva itorero ry’igihugu ryatangizwa mu 2007, Abanyarwanda hafi miliyoni 1 n'igice nibo baritorejwemo naho umubare w’abatoza urasaga 1,400.