Inama nyungura bitekerezo mu nteko iri kwiga ku buryo bwo kurengera abaturage

Mu nteko ishinga amategeko harimo kubera inama nyungurana bitekerezo ku isano iri hagati y’ubuhinzi na gahunda yo kurengera abatishoboye. Perezida w'umutwe w'abadepite Mukabalisa Donatille yavuze ko nk'abagize inteko ishinga amategeko bishimira kuba ibitunga abanyarwanda ibyinshi ari ibikomoka mu gihugu imbere hanze hakava bike.

Naho Ministri w'ubutegetsi bw'igihugu Francis Kaboneka yavuze ko umusaruro uva ku ngamba na politiki zijyanye no kurengera abatishoboye mu Rwanda ushimishije. Ngo bikagaragazwa n'imibare itangwa n'iyo minisiteri ku byamaze kugerwaho na gahunda zitandukanye nka VUP, Girinka, Ubudehe n'izindi zafashije abaturage kuva mu bukene.

Ministri w'ubuhinzi n'ubworozi Dr Gerardine Mukeshimana, we yongeyeho ko gahunda ya Girinka yafashije mu kurwanya imirire mibi kandi bituma abaturage bihaza mu biribwa kubera gukoresha ifumbire.

Izi gahunda zo kurengera abatishoboye, zirasesengurirwa abagize inteko ishinga amategeko mu biganiro nyunguranabitekerezo byateguwe n'inteko mu rwego rwo kumenya ibikorerwa abaturage muri izo gahunda.