Ingabo z'u Rwanda muri CAR zatanze ibikoresho by'ishuli ku banyeshuli i Bangui

Ingabo z’u Rwanda ziri mu butumwa bwo kubungabunga amahoro muri Centrafrique zatanze inkunga y’ibikoresho by’ishuri n’ibyo mu biro ku mashuri abiri aherereye mu murwa mukuru Bangui.

Ibikoresho byatanzwe bifite agaciro ka Miliyoni zirindwi z’ama CFA amafaranga akoreshwa muri Centrafrique.

Ibi bikoresho byahawe ishuri ribanza rya Gbanya Dombia rya kisilamu, ndetse n’ishuri ribanza rya Malikama rya gikirisitu.

Minisitiri w’Uburezi muri Centrafrique, Noure Moukadas yashimiye Guverinoma y’u Rwanda muri rusange, ndetse by’umwihariko ashimira aba basirikari ku bw’umusanzu bakomeje gutera iki gihugu.

Yagaragaje ko ubu bufasha ari ikimenyetso cy’ubufatanye butajegajega hagati y’u Rwanda na CAR, anabwira aba basirikari bari mu butumwa bw’amahoro ko igikorwa bakoze ari ukugaragaza ko “Inshuti nyanshuti uyibonera mu byago.”

Naho Umuyobozi w’ingabo z’u Rwanda ziri mu butumwa muri CAR, Lt Col. C. Kirenga, yijeje abakirisitu n’abayisilamu bari aho ko ingabo z’u Rwanda zizakomeza gukora ibishoboka byose ngo zitange ubufasha bushoboka.