Inteko ivuga ko amagambo akoreshwa mu ikoranabihanga ashobora gusoba abaturage

Uruhare rw'ikoranabuhanga mu buhinzi n'ubworozi rwagaragaye nka kimwe mu bishishikaje cyane abadepite ubwo basuzumaga imbanziriza mushinga y'ingengo y'imari ya minisiteri y'urubyiruko n'ikonabuhanga y'umwaka wa 2017/2018 hamwe n'iy’igihe giciriritse; ni ukuvuga mu myaka itatu iri imbere.

Abadepite kandi bagarutse ku nyito n'amagambo akoreshwa mu ikoranabuhanga ngo basanga ashobora gusoba abaturage ndetse bagaragaza ko hakwiye ubukangurambaga bukomeye kugira ngo koko abaturage barusheho gusobanukirwa Ikoranabuhanga ryatangiye kwinjira mu buzima bwose bw'igihugu nkuko bitenganyijwe mu cyerekezo 2020.

Bashingiye ku byerekezo by’igihugu n’imyanzuro y’umwihero w’abayobozi uheruka, abadepite babajije ibibazo bitandukanye ku bijyanye n’ikoranabuhanga.

Minisitiri w'urubyiruko n’ikoranabuhanga Jean Philbert Nsengimana ngo asanga inteko y'ururimi n'umuco ikwiye gufasha mu gushaka amagambo yihariye akoreshwa mu ikoranabuhanga nubwo ngo hagiye gushyirwa ingufu mu kurushaho kubisobanurira abaturage mu gihe yagaragaje ko hamaze guterwa intambwe ikomeye mu kugera ku bipimo  by'ikoranabuhanga igihugu cyihaye.