Inteko rusange z'abanyamuryango ba RPF zemeje uzabahagararira mu matora

Inteko rusange y'abanyamuryango ba RPF Inkotanyi ku rwego rw' akarere ka Kicukiro  n'abo mu karere ka Gasabo  zemeje Paul Kagame nk'umukandida ugomba kubahagararira mu matora y' umukuru w' igihugu azaba muri Kanama uyu mwaka.

Aba banyamuryango bitabiriye iki gikorwa basaga 1000, bamwe muri bo bavuga ko bamutoye bitewe n' ibyiza yabagejejeho, bakaba bifuza ko yakomeza kuba kw' isonga mu mibereho myiza n' iterambere ryabo.

Mu matora yakozwe buri wese yandika ku gapapuro ke, ku bwiganze bw'amajwi 100%, ni ukuvuga abanyamuryango bagera ku 1170, bemeje Paul Kagame nk'umukandida, ugomba kuzamuka ku rwego rw' umujyi wa Kigali, akazabahagararira mu matora ya Perezida wa Repubulika.

Aba banyamuryango bavuga ko hari byinshi bashingiraho baha icyizere Paul Kagame ngo azabahagararire mu matora y'  umukuru w'igihugu. Rutayisire Augustin, umunyamuryango muri Kicukiro, yagize ati "Nubwo napfuye amaso kubera urugamba, ntacyo atangejejeho. Ntago yaretse ngo nandagare ku muhanda, hari ibyo angenera ku kwezi, yanyubakiye inzu, yampaye inka. Ntacyo atakoze, akomeze yubake u Rwanda"

Mu Karere ka Gasabo abanyamamuryango ba RPF Inkotanyi bagera ku 833 nibo bitabiriye inteko rusange yabo yabaye kuri uyu wa gatandatu.

Abanyamuryango ba RPF Inkotanyi basabwe kandi kuzuza ibisabwa byose birimo gushaka indangamuntu kubatazifite no kwiyandikisha kuri liste y'itora kugirango bazashobore kwitabira amatora mu bwisanzure.