Inzobere z'abaganga bo mu bwongereza bavuye abaturage barwaye Hernia

Kuva kuri uyu wa mbere, abantu bagera kuri 80 bafite ibibazo byo mu  muhogo, mu mazuru, mu matwi no mu kanwa ndetse n'abafite uburwayi mu nda bizwi kw' izina Hernie batangiye kubagwa uburwayi bafite.

Ni  ku bufatanye bw' ibitaro bya Kaminuza bya Kigali n'itsinda ry'abaganga baturutse mu gihugu cy' ubwongereza, bo mu muryango Rwanda Legacy of Hope.

Ubuyobozi bwa CHUK  buvuga ko  kuza kw'amatsinda nk aya bifasha mu kugabanya umubare munini w'abarwayi baba bategereje kubagwa kuko kuri ubu bari bafite abagera kuri 300 bategereje kubagwa bene ubu burwayi. Bamwe mu barwayi  baje kugirango babagwe bavuga ko bafite ikizere cyo gukira uburwayi bukomeye bari bafite.

Ikiguzi ku murwayi umwe wa Hernie aramutse abagiwe mu gihugu cy' ubwongereza, ngo ni miliyoni 2 zisaga z'amafaranga y'u Rwanda, mu gihe mu ndwara zo mu myanya y'ubuhumekero ari miliyoni zisaga 4.

Uretse mu bitaro bya Kaminuza bya Kigali, itsinda ry'abaganga baturuka mu bwongereza rirakorera  no mu bindi bitaro bigera kuri 5 byo hirya no hino mu gihugu, aho muri rusange bagomba kubaga abarwayi bagera kuri 250, bose bakaba bazabagwa ku buntu.