Inzu z'icyitegererezo mu karere ka Kicukiro zatangiye kubakwa

Akarere ka KICUKIRO karatangaza ko mu kwezi kwa gatandatu kazaba gafite umudugudu w'icyitegererezo uri mu gace k'icyaro ka AYABARAYA.

AYABARAYA ni agace k'icyaro ko mu karere ka KICUKIRO gaherereye mu murenge wa MASAKA. Muri aka gace niho harimo kubakwa umudugudu w'icyitegererezo ugizwe n'inzu 10 zo guturamo buri imwe igizwe n'inzu 4. Hazubakwa n'ivuriro, irerero, isoko rya kijyambere, agakiriro ndetse hanavugururwe ishuri ryisumbuye rihasanzwe.

Umudugudu w'icyitegererezo wa AYABARAYA uzuzura utwaye amafranga y'u Rda asaga miliyari 2.

Umuyobozi w'akarere ka KICUKIRO Dr Jeanne NYIRAHABIMANA avuga ko bafatanyije n'indi miryango biteze ko mu kwezi kwa 6 ibikorwa remezo byinshi bizaba byararangiye.

Uyu mudugudu w'icyitegererezo uzubakwa kuri hegitari 25, ingengo y'imari ukazubakwa ku bufatanye bw’akarere ka Kicukiro na  World vision, water for people ndetse na bamwe mu baturage bo mu karere ka KICUKIRO.