Kamonyi: Impanuka y'imodoka yahitanye abantu bageze kuri 11

Ahagana saa mbili z’ijoro ryakeye kuri uyu wa gatatu ku muhanda wa Kigali – Muhanga ugeze mu murenge wa Musambira imodoka y’ikamyo yambaye plaque yo muri Uganda yagonganye n'imodoka ya Toyota Coaster ya Horizon Express yari itwaye abagenzi 28 abantu 11 bahasiga ubuzima ako kanya naho ababarirwa muri 18 barakomereka.

Iyo mpanuka yabereye ahitwa i Karengera mu mudugudu wa Nyarusange.

Mu kiganiro RBA yagiranye n’Umuvugizi w’Ishami rya Polisi y’u Rwanda rishinzwe umutekano wo mu muhanda, CIP Kabanda Emmanuel yatangaje ko abantu 11 bahise bagwa muri iyo mpanuka.

CIP Emmanuel Kabanda yongeyeho ko baba abapfuye n’abakomeretse bashyikirijwe ibitaro bya Kabgayi mu karere ka Muhanga.

CIP Kabanda yavuze ko iperereza ryatangiye gukorwa n’abagenzacyaha ba polisi ngo hamenyekane icyateye iyo mpanuka.