Kayonza: Hon. Mukabalisa yasabye abaturage kunoza ibikorerwa mu Rwanda

Bamwe mu baturage b'akarere ka Kayonza baratangaza ko bamaze kugera kuri byinshi kubera gahunda y'igihugu yo kuzamura ibikorerwa mu Rwanda cyangwa Made in Rwanda.

Gusa aba baturage bemeza ko babwiye izi ntumwa za rubanda mu rugendo zikomeje kugirira mu turere dutandukanye tw'igihugu ko nubwo bafite inganda zigenda zitera imbere ngo ziracyabangamiwe n'ibibazo birimo iby'amazi meza, amashanyarazi agihenze kandi acikagurika kenshi, bimwe mu bikoresho by'ibanze bakoresha babitumije hanze y'igihugu ndetse n'amasoko y'ibyo bakora akiri make.

Kuri ibi bibazo, abadepite babizeje ko babyumvise kandi ko bagiye kubikorera ubuvugizi hamwe n'izindi nzego kugira ngo harebwe icyakorwa.

Gusa, kurundi ruhande Perezida w'inteko ishingamategeko Donatille Mukabalisa asaba ko ahagaragaye ibitagenda neza byakosorwa, inganda koko zikaba inkingi y'iterambere rihamye ry'igihugu,  naho aho bigenda neza nabyo bikihuta kurushaho, ''Icyo dusaba nugukomeza kurushaho kunoza imirimo bakora bakanayagura kugira ngo irusheho gutera imbere n'imikorere irusheho kuba myiza kurenza uko bimeze uyu munsi wa none, ariko nanone icyo twakwishimira nuko aho bageze hashimishije''