Ibihugu bigize EAC birasabwa kongera umusanzu mu guteza imbere ubumenyi

I Kigali hateraniye inama ya mbere ihuza komisiyo y’umuryango wa Afurika ishinzwe ubumenyi n’ikoranabuhanga hamwe n’abafatanyabikorwa bayo barebera hamwe uko ibihugu binyamuryango byagera ku iterambere ry'ubukungu n'imibereho myiza bishingiye ku bumenyi n’ikoranabuhanga.

Umunyamabanga mukuru wungirije w'umuryango wa Afurika y'iburasirazuba Jessica Eriyo avuga ko hakibura amikoro yo kugira ngo iyi komisiyo y’ubumenyi n’ikoranabuhanga izagirire akamaro uyu muryango: “Mu gihe cyo gutegura ingengo y'imari yabo y'uyu mwaka yaragabanutse cyane kuko imisanzu yo mu bihugu by'abanyamuryango ntiyari ihagije, tuzi ibibazo ibihugu bihura nabyo biba binafite inzego zihutirwa kuri bo ariko ndahamagararira ibihugu kongera imisanzu kuko EASTECO ntikorera EASTECO irakorera ibihugu by'abanyamuryango bityo tugahuza ibikorwa by'umuryango n'ibikorwa by'ibihugu ubwabyo”

Minisitiri w'uburezi Dr. Papias Musafili Malimba we avuga ko u Rwanda ruha uruhare runini ikoranabuhanga mu iterambere ryarwo ari yo mpamvu rwifuza no kubishimangira binyuze muri iyi komisiyo yo muri EAC.

Guteza imbere  ubumenyi n'ikoranabuhanga ni kimwe mu bigize amasezerano 16 yasinywe hagati y'ibihugu 6 bigize umuryango wa Afurika y'iburasirazuba. Ibi ni nabyo byatumye mu mwaka ushize wa 2015 hajyaho komisiyo ishinzwe ubumenyi n'ikoranabuhanga muri uyu muryango.