Ministiri w'intebe yatangaje ko ibiciro kuri serivisi z'ubuvuzi bigiye kuzamurwa

Ikiguzi cya serivisi z’ubuvuzi kigiye kuzamurwa kubera ko amafaranga yishyurwaga ngo atari akijyanye n’ibikoresho bikoreshwa mu buvuzi bugezweho ngo hanaboneke n’igihembo cy’abatanga izo serivisi.

Ibi byatangajwe na ministre w'intebe Anastase Murekezi kuri iki cyumweru ubwo yasozaga itorero ry'abakora mu rwego rw'ubuvuzi.

Minisitiri w’Intebe Murekezi yavuze ko ibi biciro bizazamurwa muri uku kwezi kwa 12, hagendewe ku iteka rya Minisitiri ufite imari mu nshingano ze.

Yakomeje avuga ko bizahera cyane ku bigo by’ubwishingizi bw’indwara nka RSSB, yemeye kuzamura amafaranga kugira ngo ubuzima bw’abanyanyarwanda burusheho kubungabungwa neza, kandi umurimo w’abaganga na wo urusheho guhabwa agaciro.

Gusa uku kwiyongera kw’ikiguzi cy’ubuvuzi guverinoma irizeza ko nta ngaruka bizagira ku murwayi, kuko ibizongerwaho byose ari ibizajya byishyurwa n’ibigo by’Ubwishingizi bw’indwara gusa.