Morocco igiye gufungura ambasade mu Rwanda

Minisitiri w’Ububanyi n’Amahanga w’u Rwanda Louise Mushikiwabo ejo yatangaje ko Ambasaderi mushya wa Maroc amaze iminsi ibiri amushyikirije impapuro zimwemerera guhagararira igihugu cye mu Rwanda, akazazishyikiriza na Perezida wa Repubulika mu minsi iri imbere.

Yavuze ko Maroc yafunguye Ambasade mu Rwanda, ikaba ihari, na ambasaderi agiye gutangira gukora ndetse mu biganiro hagati y’abakuru b’ibihugu byombi, u Rwanda rwamenyesheje igihugu cya Morocco y’uko rugiye gufungurayo ambasade.

Minisitiri Mushikiwabo yavuze ko ibi bifite akamaro gakomeye yaba mu ishoramari no guteza imbere ubukerarugendo hagati y’ibihugu byombi, dore ko mu ruzinduko rw’umwami Mohammed VI uri mu Rwanda ibihugu byombi byanasinyanye amasezerano menshi arimo n’ayihariye kuri ziriya ngingo.

Ibi yabitangaje mu gihe Umwami wa Maroc, Mohammed VI kuri ubu ari mu ruzinduko rw’iminsi itatu mu Rwanda.