Muhanga: Umukozi wa SACCO afunzwe akekwaho kunyereza Miliyoni 7

Polisi y’ u Rwanda yataye muri yombi umukozi wa SACCO y’Umurenge wa Rugendabari ho mu Karere ka Muhanga, akekwaho kunyereza miliyoni 7 z’amafaranga y’u Rwanda.

Uyu mukozi usanzwe atanga amafaranga ku bagana Sacco, yafashwe ku italiki ya 4 Gicurasi nyuma y’uko umucungamari w’iyo Sacco atahuriye icyuho mu bitabo bimwe na bimwe yakoreshaga.

Umuvugizi wa Polisi mu Ntara y’Amajyepfo, CIP Andre Hakizimana yavuze ko nyuma yo kwakira ikirego, uyu mugabo yabaye afunzwe kugira ngo iperereza rikorwe neza.

CIP Hakizimana avugako iperereza ry’ibanze ryatumye hafatwa ibitabo by’ibihimbano byakoreshwaga n’uyu ukekwaho ibyaha, aho yandikaga amafaranga akurikiranyweho.

Yongeyeho kandi ko yari afite ibitabo bye ku ruhande yandikamo abakiliya babikije amafaranga, akaba nta handi hantu yajyaga abandika mu bitabo bisanzwe bya Sacco, kandi Polisi ikaba kuri ubu ibifite ku buryo bizafasha mu iperereza.