OAFLA: Madamu Jeannette Kagame aratanga ikiganiro

Madamu Jeannette Kagame uri muri Ethiopia, kuri uyu wa kabiri aratanga ikiganiro mu nama ya 18 y’Umuryango w’abafasha b’abakuru b’ibihugu bya Afurika urwanya Sida, OAFLA, inama iteganyijwe kuri uyu wa kabiri i Addis Ababa ahanateraniye inama ya 28 y’Umuryango wa Afurika yunze Ubumwe.

Itangazo ry’Ibiro bya Madamu Jeannette Kagame rigaragaza ko iyi nama ari umwanya wo gusuzuma ibyagezweho n’uyu muryango ndetse hakanarebwa icyakorwa n’ahakongerwa imbaraga kugirango uyu muryango urusheho kugera ku ntego zawo.

Iyi nama, iraba n’umwanya wo kwizihiza imyaka 15 umaze ushinzwe, ku nsanganyamatsiko igira iti “Kubakira ku myaka 15 duharanira gukomeza amahirwe y’urubyiruko rwa Afurika binyuze mu guteza imbere ibyifuzo by’abangavu no kubafasha kugera ku buvuzi bubanogeye

Ku munsi w’ejo Madamu Jeannette Kagame akaba yari yitabiriye inama nk’iyi yabaye mu muhezo iyobowe na Madamu wa Perezida wa Malawi, Gertrude Mutharika. Yari kumwe na bagenzi be bo muri Tchad, Equatorial Guinea, Ethiopia, Malawi, Niger, Comoros, Namibia, Afurika y’Epfo na Sierra Leone.