Perezida Ghali na Macky Sall batunguwe n'ubwiyunge basanganye abanyarwanda

Perezida wa repubulika iharanira demokarasi ya SAHRAWI Brahim Ghali ndetse n’uwa Senegal Macky Sall mbere y'uko basoza uruzinduko rwabo mu Rwanda basuye urwibutso rwa jenoside rwa Kigali ruri ku Gisozi. Bavuze ko jenoside ari icyaha ndengakamere kitagomba kugira ahandi kiba ku isi, gusa nanone ngo batunguwe n’iterambere n’ubwiyunge basanganye abanyarwanda.

Akigera ku rwibutso rwa Jenoside rwa Kigali ku Gisozi, Perezida wa repubulika iharanira demokarasi ya SAHRAWI Brahim Ghali yabanje kunamira inzirakarengane z’abatutsi zisaga ibihumbi 250 zihashyinguye, nyuma azengurutswa ibice bitandukanye bigize urwibutso ari nako asobanurirwa amateka. Ni amateka ya mbere y’ubukoloni, mu gihe cy'ubukoloni na nyuma yabwo kugeza ubwo hategurwaga hakanashyirwa mu bikorwa jenoside yakorewe abatutsi.

Umukuru wa repubulika iharanira demokarasi ya SAHRAWI avuga ko yababajwe n’ubwicanyi bwakorwaga kuva ku musaza kugera ku ruhinja bazira uko bavutse. Kuri we ngo bigomba kubera isomo isi yose, cyane cyane Afurika ko abantu bagomba guharanira kunga ubumwe: “Twabonye uburyo abana, abagore n'abagabo bababajwe bakorerwa ibya mfurambi  ariko kandi twanabonye imbaraga zashyizwemo na perezida wanyu cyane cyane mu kunga abanyarwanda  ubwiyunge bugakunda bakubaka igihugu gifite icyizere cy'ejo hazaza. Ni ubutumwa ku isi ko bagomba kwigira kuri ibi bagahaguruka bakabirwanya ku buryo bitazongera n'ahandi ahariho hose.”

Brahim Ghali w’imyaka 66 ni perezida wa SAHRAWI kuva mu mwaka wa 2010. Iki gihugu kikaba cyarahoze kibarirwa muri Maroc ubwo cyakolonizwaga na Espagne  ariko nyuma kiza kwigenga aho kuri ubu kinabarirwa mu muryango wa Afurika yunze ubumwe.