AGEZWEHO


Perezida Kagame yakiriye impapuro z'abambasaderi bashya batanu

Yanditswe July, 07 2016 at 17:39 PM | 1036 Views



Perezida wa Repubulika Paul Kagame kuri uyu wa kane muri Village Urugwiro yakiriye abambasaderi batanu bari baje kumuha impapuro zibahesha uburenganzira bwo guhagararira ibihugu byabo mu Rwanda. Aba bambasaderi bose bahagarariye ibihugu byo ku mugabane w'afrika, bemeje ko bashishikajwe no kuzamura umubano usanzwe uri hagati y'ibihugu byabo n'u Rwanda.



Ambasaderi FARID BOULAHBEL niwe wabimburiye abandi mu gushyikiriza nyakubahwa Prezida Kagame impapuro zimuhesha uburenganzira bwo guhagararira repubulika iharanira demokarasi ya Algeria afite icyicaro i Kampala muri Uganda.

Yavuze ko uruzinduko Umukuru w'igihugu cy'u Rwanda yagiriye muri Algeria rwashimangiye umubano w'ibihugu byombi ari yo mpamvu nawe aje kuwushimangira.

Yagize ati: “Bitewe n'urugendo rw'amateka Perezida Kagame yagiriye i Alger mu kwezi kwa kane habonetse uburyo bushya mu gushimangira ubwo bufatanye mu kuwunoza ku bw'inyungu z'abaturage ba Algeria n'u Rwanda.”

Joseph Andre NOURRICE nawe agiye gutangira imirimo yo kuba ambasaderi wa Seychelles mu Rwanda afite icyicaro i Addis Abeba muri Ethiopia. Nawe ari mu bashyikirije perezida Kagame inyandiko zimuhesha uburenganzira bwo gutangira imirimo ye. Yavuze ko yifuza ko u Rwanda rwakungukira ku bunararibonye iki gihugu gifite mu bijyanye n'ubukerarugendo.


Yakurikiwe na KWAME Assamoah ugiye guhagararira igihugu cya Ghana mu Rwanda afite icyicaro i Nairobi mu Kenya. Asanga kuba u Rwanda rwaratangije ingendo z'indege Kigali Accra ari amahirwe yo kwagura ubucuruzi.


Keita Diamou wo mu gihugu cya Mali nawe yashyikirije umukuru w'igihugu Paul Kagame impapuro zituma yemererwa kuba ambasaderi w'igihugu cye mu rwanda akaba afite icyicaro i Luanda muri Angola.

Yabwiye itangazamakuru ko igihugu cye n'u Rwanda bisanganywe umubano uzira amakemwa, akaba aje kuwushimangira.

Uwasoje mu kwakirwa n'umukuru w'igihugu ni ambasaderi Mahajir Ousman IBRAHIM uzahagararira igihugu cya Tchad mu Rwanda afite icyicaro i Kinshasa muri DRC. Yavuze ko igihugu cye gihangayikishijwe n'iterabwoba, no kugira uruhare mu kubungabunga amahoro nk'uko u Rwanda rubikora

Kuba ibihugu bikomeje kohereza ababihagararira mu Rwanda, birashimangira umubano mwiza u Rwanda rufitanye n'ibihugu bitandukanye byo hirya no hino ku isi. Aba bashyikirije perezida Paul Kagame impapuro zibahesha uburenganzira bwo guhagararira ibihugu byabo, bose ni abo ku mugabane wa Afurika.




Ba wambere gutanga igitekerezo

Tanga igitekerezo:



RSS FEED

Ubushakashatsi bwa EPRN bwerekana ko politike y'ubukungu mu Rwanda yateye i

Inteko yatoreye umushinga w'itegeko rigenga amasosiyete y'ubucuruzi

EAMBS: Ku munsi wa kabiri haganiriwe ku ruhare rw’ababa mu mahanga mu iter

Abikorera bo mu Rwanda nibo nkingi y’urwego rw’ubukungu-PM Murekezi

Perezida Kagame yahawe igihembo cya The Dr Miriam and Sheldon Adelson award

Abadepite bemeje umukwabu wo gushakisha abateye abangavu inda