Perezida Kagame yitabiriye inama ku bufatanye hagati ya Afrika n'Uburayi

Perezida wa Republika Paul Kagame  ari i Abidjan muri Cote d’Ivoire aho yitabiriye inama ya gatanu ihuza Afrika n’u Burayi. Iyi  nama y’iminsi ibiri yatangiye imirimo yayo kuri uyu wa gatatu.

Byitezwe ko yitabirwa n’abakuru b’ibihugu na za guverinoma barenga 80 n’abandi bantu babarirwa mu bihumbi  bitanu baturutse mu bihugu byose bigize umuryango w’Afrika yunze ubumwe  no mu bindi 28 by’ubumwe bw’u Burayi. Muri iyi nama haraganirwa ku ngingo zirebana n’ibibazo by’abimukira n’umutekano.

Ku bijyanye n’iyi nama ibera muri Cote d’Ivoire, mu nama y’umuryango w’Afrika yunze ubumwe yabereye i Kigali mu Rwanda muri Nyakanga 2016,  niho hemerejwe ko iki gihugu cya Cote d’Ivoire kizakira inama ya gatanu ihuza Afrika yunze ubumwe n’umuryango w’ubumwe bw’u Burayi.

Inama ya mbere ihuza u Burayi n’Afrika yatangiye mu mwaka wa 2000, ibera i Cairo mu Misiri. Ubusanzwe iyi nama iba nyuma ya buri myaka itatu.