Perezida Kagame yitabiriye inama ku mahoro n'umutekano i Dakar muri Senegal

Perezida w'igihugu cya Senegal Macky Sall yaraye yakiriye mugenzi we w'u Rwanda Perezida Paul Kagame, i Dakar  aho umukuru w'igihugu yitabiriye imirimo y'inama y'ihuriro mpuzamahanga ku mahoro n'umutekano.

Ni inama iteranye ku nshuro ya kane, aho abayitabiriye baza kwiga ku bibazo by'umutekano byugarije Afrika muri iki gihe hashakwa ibisubizo. 

kuri uyu wa mbere nibwo itangira imirimo yayo aho ihuje abasaga 400 harimo abakuru b'ibihugu na za guverinoma, abayobozi mu nzego nkuru za politike n'igisirikare mu karere no ku rwego mpuzamahanga, impuguke, abashakashatsi baturutse mu muryango wa Afrika yunze ubumwe, mu muryango w'ubumwe bw'uburayi ndetse no mu muryango w'abibumbye. Iyi nama kandi iritabirwa n'abagize sosiyete sivile.