Perezida w'inzibacyuho wa CAR yasezeye anashimira abasirikare b'u Rwanda

Uwahoze ari perezida w’inzibacyuho wa Centrafrique madame Catherine Samba Panza, ku mugoroba wo kuri uyu wa mbere yasezeye ku basirikare b’u Rwanda bari bashinzwe kumurinda. 

Ni umuhango wabereye iwe ahitwa OUANGO, mu mujyi wa Bangui. Madame Catherine Samba Panza yashimye ikinyabupfura n’ubunyamwuga yabonye ku ngabo z’u Rwanda ziri mu butumwa bwo kugarura amahoro muri icyo gihugu.

Yanazishimiye uburyo zamucungiye umutekano hamwe na guverinoma yari ayoboye mu gihe cy’inzibacyuho muri Centrafrique.

Amabwiriza aturuka mu buyobozi bukuru bw’ingabo z’umuryango w’abibumbye muri Centrafrique (MINUSCA)  avuga ko guhera ku itariki 1 Kamena 2016, ni ukuvuga ku munsi w’ejo ku wa Gatatu, ingabo z’u Rwanda zizahagarika gucungira umutekano mu buryo bw’umwihariko Madamu Catherine Samba Panza.