Polisi ivuga ko abantu 20 aribo bamaze gufatwa bakekwaho gutanga ruswa

Umuyobozi w’ishami rya  Polisi y’u Rwanda rishinzwe ubugenzuzi bw’umurimo n’imyitwarire ngengamikorere, Assistant Commissioner of Police (ACP) Jean Nepo  Mbonyumuvunyi yavuze ko bafatiwe mu bice bitandukanye by’igihugu mu mpera z'icyumweru dusoje.

Yongeraho ko ruswa bagerageje gutanga iri hagati y’ibihumbi bibiri na bitanu by’amafaranga y’u Rwanda.

Police ivuga ko kuva uyu mwaka utangiye, abantu bagera kuri 20 bamaze gufatwa baha ruswa abapolisi kugira ngo be guhanirwa kwica amategeko y’umuhanda ndetse n’ibindi byaha.

Mu mwaka ushize abafatiwe mu cyuho barengaga 200 bagerageza guha ruswa abapolisi.

Umuntu uhamwe n’icyaha cya ruswa ahanishwa igifungo kuva ku myaka ibiri kugeza ku myaka itanu n’ihazabu y’amafaranga y’u Rwanda yikubye inshuro kuva kuri ebyiri kugeza ku icumi z’agaciro ka ruswa yashatse gutanga nk’uko biteganywa n’ingingo ya 640 yo mu gitabo cy’amategeko ahana ibyaha mu Rwanda.