Polisi yatangiye gushyira ibyapa byo mu muhanda ahantu hatandukanye bikenewe

Polisi y'u Rwanda ishami rishinzwe umutekano wo mu muhanda iratangaza ko ku bufatanye n'izindi nzego yatangije igikorwa cyo gushyira ibimenyetso n'ibyapa bifasha abatwara ibinyabiziga.

Ibi byatangajwe ubwo iki gikorwa cyo gushyira ibimenyetso mu mihanda itandukanye mu gihugu byakorerwaga mu karere ka Kicukiro.

Ibi ni  mu gihe  bamwe mu bakoresha ibinyabiziga bavuga ko hakwiye kubaho uburyo buhoraho bwo gusibura ibimenyetso mu muhanda biba byarasibamye, cyane mu bice byo mu Ntara.

Umuvugizi wa Polisi ishami rishinzwe umutekano wo mu muhanda CIP Emmanuel Kabanda avuga ko mu gihugu hose hari ahantu 36 ku bufatanye na RTDA harimo gutunganywa bitewe n'impanuka zikomeye zigenda zihabera mu bihe bitandukanye.

Umuyobozi w'umujyi wa Kigali wungirije ushinzwe ubukungu Busabizwa Parfait avuga ko bidakwiye ko abantu bakomeza gutakaza ubuzima bitewe n'uko hari abatubahiriza amabwiriza agenga ikoreshwa ry'imihanda.

Ibi ni bimwe mu bikorwa Polisi y'u Rwanda ikomeje gukora muri gahunda yayo yitwa Police Week. Ibikorwa bizasozwa taliki 16 z'uku kwezi.