RMC n'abafatanyabikorwa basuzumiye hamwe uko itangazamakuru rihagaze mu Rwanda

Urwego rw'abanyamakuru bigenzura RMC ruratangaza ko rwakiriye ibirego birenga 180 mu myaka 3 ishize. Ibi byagaragajwe kuri uyu wa kane ubwo abahagarariye ibitangazamakuru byo mu Rwanda n’abafatanyabikorwa babyo bareberaga hamwe uko itangazamakuru rihagaze muri iki gihe.

Urwego rw'abanyamakuru bigenzura ruzwi, Rwanda Media Commission, rumaze kugira abanyamakuru barenga 600 biyandikishije nk’abanyamuryango barwo. Umuyobozi w’agateganyo w'uru rwego Bwana Cleophas BARORE avuga ko mu myaka itatu ishize bakiriye ibirego 183, muri byo ibigera ku 104 byatanzwe n’abaturage naho 46 biri hagati y’abanyamakuru ubwabo, ibindi babigirana n'izindi nzego zitandukanye.

Bamwe mu bahagarariye ibitangazamakuru cyane cyane ibyigenga bavuga ko kugira ngo ibi bibazo bikumirwe barimo gushyira ingufu mu kubaka ubushobozi n'ubunyamwuga bw'abanyamakuru.

Mu biganiro byahuje Ikigo cy'igihugu cy'imiyoborere RGB n'abahagarariye ibitangazamakuru ndetse n'abafatanyabikorwa babo bishimiye ko mu mavugurura yabaye kuva mu myaka ine ishize yatanze umusaruro mu iterambere ry'itangazamakuru.