Rwanda: Abikorera ku giti cyabo barashima urwego za gasutamo zimaze kugeraho

Urugaga rw'abikorera mu Rwanda, rushima intambwe imaze guterwa n’urwego rw'abunganira abacuruzi muri za Gasutamo, kuko ngo rutakirangwamo imikorere yari igamije gufasha abacuruzi kwinjiza magendu mu gihugu. Ubu ngo bageze ku rwego rwo guhatana ku isoko mpuzamahanga bitewe na serivisi batanga.

Afurika Buzigirwa ushinzwe ubucuruzi muri sosiyete icuruza ibijyanye n'ibisenge by'inzu mu Rwanda, ni umwe mu bajyaga kuzana imizigo y'isosiyete akoramo mu bihugu byo hanze. Kubera akazi kenshi aza guhitamo kuzajya akoresha abunganira abacuruzi muri gasutamo, cyangwa aba declarants, kuko yabonaga aribyo byamufasha cyane kuruta ibindi: “Hari itandukaniro, iyo ubyikoreye ubwawe, ubijyamo cyane ariko ubu ni nko gutanga akazi, ukagaha ababifitemo inararibonye, akaba ari nabo babyihutisha, kuko njyewe n'akandi kazi mba mfite usanga bitwaye igihe kinini.”

Umuyobozi w'urugaga rw'abikorera mu Rwanda, Gasamagera Benjamin, yemeza ko urwego rw'imikorere y'abafasha abacuruzi muri za gasutamo rumaze gutera imbere, kuko mbere bavugwagaho uburiganya bwabaga mu bucuruzi: “Habayeho igihe batakoranaga neza, ariko ubu barakora neza cyane, kubera ubufatanye bagiranye na Rwanda revenue. ikindi bagezeho cyiza cyane ni imikoranire mu karere, bari mu bantu ubu bemerewe gukorera ku byambu byacu, muri East African community, so ni ikintu kiza kitworohereza akazi, ndetse n'aho imizigo igenda ica hose, ubwo rero turabifashisha cyane, bikaba byaranabafashije kugirango bazamure ubunyamwuga bwabo.”

Kugeza ubu mu Rwanda habarurwa ibigo byunganira abacuruzi muri za Gasutamo bigera ku 150, bifasha abacuruzi kuzana imizigo itandukanye iturutse hirya no hino ku isi byifashsishije icyambu cya Dar es salaam mu gihugu cya Tanzania ndetse na Mombasa mu gihugu cya Kenya.