Sena yatangiye kumenyekanisha amahame remezo mu turere twose tw'igihugu

Nyuma y'uko Sena igabanyirijwe amategeko itora kugira ngo ibashe kubungabunga amahame remezo akubiye mu itegeko nshinga, ubu noneho uru rwego rwatangiye kurushaho kumenyekanisha aya mahame remezo mu turere twose tugize u Rwanda.

Sena y'u Rwanda yatangiye gusobanurira abayobozi b'inzego z'ibanze n'abandi bavuga rikumvikana amahame remezo akubiye mu Itegeko Nshinga ry'u Rwanda.

Iki gikorwa kibaye nyuma y'umwaka umwe Abanyarwanda batoye Itegeko Nshinga ryavuguruwe muri 2015 . Visi Perezida wa Sena Jeanne d'Arc Gakuba avuga ko kurushaho kumenyekanisha zimwe mu ngingo z'itegeko bitavuze ko abaturage batoye itegeko nshinga badafite icyo baziho. Sena y'u Rwanda ivuga ko ibi biganiro bizatangwa mu turere twose tw'igihugu. 

Ingingo ya 84 y'itegeko Nshinga iha Sena umwihariko wo kurinda amahame remezo ateganywa n'ingingo ya 10. Mu ivugururwa ry'itegeko nshinga muri 2015, Sena yagabanyirijwe amategeko itora ku gira ngo irusheho kubungabunga amahame remezo, none ku nshuro ya mbere uru rwego rwegereye abaturage mu rwego rwo kurushaho kuyabamenyesha.