Uburere bushingiye ku muco-Perezida Kagame

Ubwo yasozaga itorero Indangamirwa ry'abanyeshuli biga mu mahanga, abitegura kujyayo ndetse n'ababaye indashyikirwa mu bizamini by'umwaka ushize, Perezida wa Repubulika Paul Kagame yabwiye intore zitabiriye iri torero ko iki gikorwa kigamije kubasogongeza ku nzira y'uburere ibafasha uko bagenda bakura. Yasabye ababa bafite imyifatire idahwitse guca ukubiri nayo, bakaba intore zibereye u Rwanda kuko bigishijwe uko bakwiyubaka bakubaka n'igihugu.

Yabasobanuriye ko itorero ririnda urubyiruko gutana rigafasha kugorora abatangiye kwangirika. Perezida Kagame yavuze kandi ko ku nshuro ya 10 abatojwe bose bakwiye kuzahurizwa hamwe bakazigishwa n'imyitozo ya gisirikare yoroheje nko kurasa, kumasha n’ibindi kandi bitabagoye.

Yavuze ko n’ubwo hari abantu bibwira ko imyitozo ya gisirikare ari ibintu bivunanye ngo babitekerejeho bababonera itavunanye bashobora.

Perezida Kagame yasabye izi ntore kandi kugira uburere bwuzuzanya n’uburezi baherewe mu mashuri.

Icyiciro cya 9 cy’itorero Indangamirwa cyitabiriwe n’urubyiruko rw’Abanyarwanda biga mu mahanga n’abiga mu Rwanda bagera kuri 345.