Urubanza rw'ubujurire rwa Pascal Simbikangwa rurakomeje mu Bufaransa

Mu gitondo cyo kuri uyu wa kabiri mu rukiko rw'ubujurire rw'i Bobigny mu Bufaransa hatangiye urubanza rw'ubujurire rwa Pascal Simbikangwa wabaye umwe mu ngabo zarindaga perezida Habyarimana, mu gihe cya Jenoside akaba yari akuriye serivise z'iperereza zitwaga icyo gihe 'criminologie'.

Mu iburanisha rya mbere Pascal Simbikangwa yari yahamijwe ibyaha bya Jenoside, anakatirwa igifungo cy'imyaka 25.

Guhera kuri uyu wa 2 tariki 25 ukwakira kugeza ku ya 09 Ukuboza uru rubanza ruraba ruburanishwa bundi bushya.

Muri iki gitondo rwatangiye hatoranywa abaturage 9 b'inyangamugayo bagomba gufatanya n'abacamanza b'umwuga mu kuburanisha uru rubanza nk'uko byagenze no mu rukiko rw'ibanze rw'i Paris mu mwaka w'2014.

Hazumvwa n'abatangabuhamya bumviswe mbere ndetse nihagira uruhande rusaba ko hakorwa andi maperereza mu Rwanda bibe byakorwa nk'uko abakurikirana uru rubanza babisobanura, uretse ko ngo kuva bitarasabwe mu iburanisha rya mbere bitapfa kubaho.