Zambia: Perezida Kagame yitabiriye inama ngarukamwaka ya 51 ya AFDB

Zambia,kuri uyu wa kabiri hatangiye inama ngarukamwaka ya Banki nyafurika Itsura amajyambere AFDB. Mu bakuru b'ibihugu bayitabiriye harimo na perezida Paul Kagame w'u Rwanda. Mu byigirwa muri iyi nama n'izindi ziyishamikiyeho harimo ikibazo cy'ingufu n'imihindagurikire y'ikirere kuri uyu mugabane wa Afurika.

Uretse gahunda nshya y’iterambere rya Afurika binyuze mu kuzamura urwego rw’ingufu z’amashanyarazi, abateraniye muri iyi nama barashakira hamwe ingamba zo guhangira imirimo urubyiruko no guteza imbere urwego rw’ubuhinzi ndetse n’ingamba zifatika mu guhangana n’ikibazo cy’imihindagurikire y’ibihe.

Edgar Chagwa Lungu perezida wa Zambia watangije iyi nama ku mugaragaro yavuze ko hatabayeho kugeza ingufu ku baturage mu buryo buhoraho ntihabaho n'iterambere rirambye. yagaragaje ko abanyafurika basaga miliyoni 640 batagerwaho na serivisi z'amashanyarazi, naho abagera kuri miliyoni 730 bakoresha ibicanwa bitari amashanyarazi mu guteka.

Yagize ati: "Abantu miliyoni 640 ntabwo bagerwaho n'amashanyarazi habe na mba! Nyamara birazwi ko bivugwa ko Afurika ifite ibintu byinshi bibyara amashanyarazi asanzwe n'ingufu zisubira. ariko na none uzwi kubamo icuraburindi mu ngo z'abaturage n'inganda zacu zikabura amashanyarazi zikoresha."

Naho ku birebana n'imihindagurikire y'ikirere yavuze ko Abanyafurika barimo kwibasirwa n'ingaruka z'ihindagurika ry'ikirere nyamara batari mu batera iki kibazo.

Muri iyi nama, Banki nyafurika y'iterambere AFDB izanatangiza gahunda yiswe Affirmative Finance Action for Women in Africa, igamije guha abagore umwihariko wo kubona imari yo gushora mu bikorwa bibyara inyungu.