Abagore n'abakobwa barakangurirwa kwandika inkuru zivuga ku bagore

Bamwe mu bagore n’abakobwa bavuga ko bagiye gushyira imbaraga mu kwandika inkuru zivuga ku bagore n’abakobwa mu Rwanda. Ibi babitangaje mu mahugurwa y’umunsi umwe yahuje abagore n’abakobwa barenga 20 bo mu Rwanda aho basobanurirwaga uburyo bwo gushyira inkuru zivuga ku bagore ku rubuga rwa Wikipedia.

Imibare y’urubuga rwa Internet Wikipedia yerekana ko 90% by’inkuru zishyirwa kuri uru rubuga zivuga ku buzima bw’abagabo kandi zikandikwa n’abagabo. Ibi ngo ni icyuho kigaragara ku rwego rw’isi.

Solange Ayanone na Gihana Donatha ni bamwe mu bagore bagaragaza imbogamizi babona zituma umubare w’abagore bagaragara ku rubuga rwa Wikipedia uri hasi.

Aba bagore bitabiriye aya mahugurwa yateguwe na ambasade ya Swede mu Rwanda, bahamya ko bahavanye ingamba nshya zizatuma umubare w’abagore bandika uzamuka. Ambasaderi wa Sweden mu Rwanda Jenny Ohlsson ashimangira ko aya mahugurwa azatuma inkuru zivuga ku bagore mu Rwanda ziba nyinshi.

Aya mahugurwa yatanzwe n’impuguke za Wikipedia zaturutse mu Budade ku nkunga ya Ambasade ya Sweden mu Rwanda.