Abanyamisiri bifatanyije n'abanyarwanda kwibuka jenoside yakorewe Abatutsi

Abanyamisiri bashima uburyo u Rwanda rukomeje kwiyubaka nyuma y'imyaka 23 abanyarwanda bavuye mu icuraburaburindi rya Jenoside yakorewe abatutsi mu mwaka w'1994.

Ibi babitangaje ubwo bifatanyaga n'abanyarwanda baba muri Misiri, mu gikorwa cyo kwibuka ku nshuro ya 23  Jenoside yakorewe abatutsi mu mwaka w'1994, umuhango wateguwe na ambasade y'u Rwanda i Cairo muri iki gihugu, igikorwa cyitabiriwe  n' inzego zitandukanye.

Mu biganiro byahawe aba banyamisiri baneretswe film mbara nkuru igaragaza amateka u Rwanda  rwanyuzemo, uko umugambi wa jenoside yakorewe abatutsi wari warateguwe n'ubuyobozi bubi bwariho ndetse n'uburyo bababibye urwango mu banyarwanda bakoresheje iturufu y'ivangura moko.

 Abanyamisiri banenze  Ibikorwa bibi by'abasize bakoze iyi jenoside ndengakamere  yakorewe abatutsi, bakidegembya mu mahanga, bakomeje gukwirakwiza ingengabitekerezo ya jenoside no kuyipfobya .

Bakomeza bavuga ko amateka mabi ya jenoside yakorewe abatutsi u Rwanda rwanyuzemo akwiye kubera isomo ibindi bihugu, ngo kuko yashegeshe imitima y'abanyarwanda ndetse n'ubukungu bw'igihugu muri rusange.

Ku rundi ruhande ariko nyuma yo kwerekwa amafoto y'ibimaze kugerwaho mu Rwanda, abanyamisiri bashima umukuru w'igihugu Paul KAGAME wagize uruhare rwo guhagarika jenoside, akunga abanyarwanda no komora ibikomere by'abarokotse jenoside, bafashwa no kwiteza imbere.