Abanyamuryango ba FPR Inkotanyi muri Nyagatare bahigiye gukemura ibibazo bikibangamiye abaturage

Abanyamuryango ba FPR Inkotanyi mu karere ka Nyagatare bahagarariye abandi mu byiciro bitandukanye, baravuga ko bahangayikishijwe n'ibibazo bikibangamiye iterambere ry'abaturage ku isonga hakavugwa ikibazo cyabana bata ishuri.

Aba banyamuryango bakaba bahigira ko bagiye gushakira hamwe ibisubizo by'ibyo bibazo, kuko ngo iyo umunyarwanda ameze neza ni nabwo n'umuryango FPR nawo uba umeze neza.

Mu kungurana ibitekerezo hagati y'abayobozi b'Umuryango FPR Inkotanyi bahagariye abandi mu byiciro bitandukanye hamwe n'ubuyobozi bw'umuryango ku rwego rw'Akarere ka Nyagatare, hibukijwe ko mu rwego rwo kwihutisha iterambere ry'uwo muryango mu bikorwa bitandukanye ukora harimo no gukemura ibibazo bigaragazwa cyane nk'ibikibangamiye imibereho y'abaturage. 

Muri ibyo bibazo bikibangamiye abaturage ikiri ku isonga  ni icabana bata ishuri, kuko nko mu gihe hashize icyumweru kimwe gusa igihembwe cya Gatatu cy'amashuri gitangiye, mu karere kose ka Nyagatare habarurwa abanyeshuri 16,384 mu byiciro byose bataragaruka ku mashuri, mu gihe abanyeshuri 118 bo bataye ishuri burundu.

Iki kibazo kimwe n'icya amwe mu baturage badafite inzu zo kubamo, icy'igwingira ry'abana n'icya bamwe mu baturage bakirarana n'amatungo n'ibyo abanyamuryango bemeza ko bagiye guhagurukira ku bikemura ku bufatanye hagati yabo n'abandi baturage basanzwe.

Chairman w'Umuryango FPR Inkotanyi mu karere ka Nyagatare akaba n'umuyobozi w'aka karere, Gasana Stephen agaruka cyane ku ikorwa  ry'ubukangurambaga bugamije gukangurira abanyamuryango gukemura ibibazo bikibangamiye iterambere ry'abaturage muri rusange, ariko bukanakorwa hagamijwe gukomeza kunoza n'imikorere myiza y'umuryango ubwabo

Hongeye kwibukiranya ko mu mikorere nyayo isanzwe iranga umuryango FPR Inkotanyi, abanyamuryango batagomba kurebera ibibazo mu baturage bibugarije ahubwo bagomba kugira uruhare rukomeye mu ku bikemura.

Ikihutirwa mu maguru mashya akaba ari icy'abana bata ishuri.