Abanyarwanda baba muri USA bizihije umunsi wo Kwibohora ku nshuro ya 28

Abanyarwanda baba muri Leta Zunze Ubumwe za Amerika basanga uruhare rwabo mu iterambere ry'u Rwanda ari ingenzi mu rugendo igihugu kirimo rwo kwibohora mu rwego rw’ubukungu. 

Ibi babitangaje mu birori byo kwizihiza kwibohora ku nshuro ya 28 byabereye i Washington D.C muri Leta Zunze Ubumwe za Amerika, aho bahuriye bari kumwe n’imiryango yabo ndetse n’inshuti z’u Rwanda ziba muri iki gihugu. 

Ni ibirori byaranzwe n’imbyino no kugaragariza ababyitabiriye bimwe mu biranga umuco nyarwanda.

Ambasaderi w’u Rwanda muri Leta zunze ubumwe za Amerika Mathilde Mukantabana, avuga ko kwizihiza uyu munsi wo kwibohora, bituma abanyarwanda baba muri iki gihugu bakomeza kwiyumva ko ari kimwe n’abandi bari mu Rwanda. 

Naho visi perezida w’umuryango w’abanyarwanda baba muri iki gihugu Cathy Kayijuka yemeza ko nabo bagira uruhare mu nzira yo kwibohora u Rwanda rurimo cyane cyane mu kwiteza imbere mu by’ubukungu. 

Ibi akaba abihuriraho na Alain Nshuti we ugaruka ku musanzu w’urubyiruko rw’u Rwanda ruba mu mahanga.