Abanyarwanda batuye muri Sudan basangiye umuganura

Abanyarwanda batuye mu gihugu cya Sudan n’inshuti zabo, bahuriye mu murwa mukuru w’iki gihugu Khartoum bizihiza umunsi mukuru w’umuganura. Uyu muhango waranzwe n’ibiganiro birimo n’imivugo igaruka ku kamaro k’umuganura ku mibanire y’abanyarwanda n’uburyo leta y’u Rwanda yashyize imbaraga mu kugarura indangagaciro nyarwanda. 

Umuyobozi w’ibiro bihagarariye inyungu z’u Rwanda mu gihugu cya Sudan, Buhungu Abel yabwiye abitabiriye ibi birori ko umuganura ari kimwe mu bigize umuco nyarwanda kandi bikaba biteganywa n’itegeko nshinga u Rwanda rugenderaho cyane cyane mu ngingo yaryo ya 11. 

Yavuze ko n’ubwo kera umuganura wizihizwaga abanyarwanda basangira umusaruro ushingiye ku buhinzi muri ibi mu bihe igihugu kigezemo, harizihizwa umuganura ahubwo hishimirwa umusaruro mu byiciro bitandakanye birimo intambwe yatewe mu buzima, uburezi, ikoranabuhanga, ubucuruzi, ubucukuzi bw’amabuye y’agaciro, ibikorwaremezo, n’ibindi.

 Muri uyu muhango kandi hanabaye igikorwa cyo kwemeza amahame shingiro y’umuryango w’abanyarwanda batuye muri iki gihugu cya Sudan.