Abanyeshuri 30 bahize abandi mu gushushanya bahawe ibikoresho bizabafasha kwagura impano bafite

Abanyeshuri 30 biga mu mashuri abanza bahize abandi mu gushushanya ku rwego rw'igihugu bahawe ibikoresho bizabafasha kwagura impano bafite, aba bakaba baragaragaje indangagaciro z'umuryango uhuza ibihugu bivuga ururimi rw'icyongereza.

Cyuzuzo Ngabo Glory w'imyaka 9 wiga ku rwunge rw'amashuri rwa Gakenge mu karere ka Gatsibo, niwe mukobwa rukumbi mu bana 30 batsinze aya marushanwa yo gushushanya.

Ahagarariye Akarere akomokamo kuko buri karere katoranijwemo umwana umwe.

Ati "Iki gishushanyo uko mukibona kiri mu ishusho y'agacuma bisobanuye ubusabane no gusangira, aka gacuma kagizwe n'ibice 3 icya mbere ni mudasobwa itwikiriwe n'ikamba bisobanuye imiyoborere myiza ihagarariwe n'umwamikazi Elizabeth, iyi mudasobwa irasobanura ikoranabuhanga, harimo ikirango cya CHOGM.''

"Igice cya 2 hari Convention Centre ihagarariye u Rwanda, hano hari abantu 2 umuhungu n'umukobwa bafite amabendera ya commonwealth  bisobanura imbaraga z'urubyiruko, kuri convention centre hari ibyicari 54 bisobanura ibihugu biri muri commonwealth.Hano hari umubumbe w'isi uzengurutswe n'umuhanda bisobanura imbaraga za commonwealth mu isi hose."

Ineza Ganza Kenny nawe w'imyaka 9 wiga ku rwunge rw'amashuri rwa Shyorongi nawe ari mu banyeshuri batsinze aya marushanwa.

"Izi ni Ingagi ziba muri Pariki ya Virunga nizo nyamanswa abakerarugendo baza gusura cyane kandi iyo baje kuzisura badusigira amadevise igihugu kigatera imbere abaturage bagatera imbere. Impamvu nashushanyije iki kuri CHOGM ni ukubera ko abazaza mu nama ya CHOGM ntabwo hazabura abaza gusura izi ngagi.''

Bamwe muri aba banyeshuri impano bafite zo gushushanya bazikura ku babyeyi babo abandi bisanze bayifite. 

Ababyeyi bavuga ko bagiye gushyigikira abana babo kugirango impano bafite zizabagirira akamaro.

Aya ni amarushanwa yateguwe na Minisiteri y'Uburezi mu bice bitandukanye by'igihugu, mu bukangurambaga bugamije gusobanura umuryango wa Commonwealth. 

Umunyamabanga wa Leta ushinzwe amashuri abanza n'ayisumbuye, Twagirayezu Gaspard avuga ko "Twari twabasabye ko buri wese ashushanya cyangwa se akora igihangano ku ndangagaciro z'umuryango wa commonwealth, ibyo mwabonye ni ibihangano byatoranyijwe mu turere 30. Iyo urebye ibyo bihangano ubona uko batekereza izo ndangagaciro z'umuryango wa commonwealth ariko babihuje n'uko babona u Rwanda n'iterambere babona mu Rwanda. Hari ukubwira ati uku niko mbona commonwealth niko mbona u Rwanda ariko uku niko nifuza byamera, tukaba tubona ari uburyo bwiza bwo gutuma abanyeshuri bacu bamenya ibibera hirya no hino ariko ikindi cya 2 ni ukubaha amahirwe kugirango batubwire uko bifuza ejo habo hazaza."

Aba banyeshuri batsinze aya marushanwa bahawe ibikoresho bizajya bibafasha gukomeza kwagura impano zabo mu bijyanye no gushushanya.