Abapolisikazi basoje amahugurwa i Gishari basabye abakobwa kwitabira kujya mu nzego z'umutekano

Abapolisikazi binjiye ku rutonde rw'Abofisiye barangije amasomo mu Ishuri rya Polisi rya Gishari, bavuze ko biteguye gutanga umusanzu mu iterambere ry'igihugu, bahamagarira abagore n'abakobwa muri rusange kwitabira kujya mu nzego z'umutekano.

Benshi mu bitabiriye ibirori byo guha ipeti abofisiye bashya, bari bahanze amaso Abapolisikazi 80 bageze kuri iyi ntera.

Aba bangana na 12% by'abofisiye bashya bose kandi bari bafite isibo yihariye mu karasisi kigaruriye imitima y'abitabiriye ibirori by'icyiciro cya 11.

Abagore n'abakobwa bamaze kugera ku rwego rw'abofisiye, bagaragaje ko batewe ishema no gutanga umusanzu mu iterambere ry'igihugu, ndetse bahamagarira abandi bagore n'abakobwa kuyoboka inzego zishinzwe umutekano.

Umuvugizi wa Polisi y'u Rwanda, CP John Bosco Kabera yavuze ko abofisiye bashya b'Abapolisikazi ari izindi mbaraga polisi ibonye muri gahunda yihaye yo guteza imbere uburinganire muri Polisi y'igihugu.

Babiri ba mbere muri batatu bahize bagenzi babo mu mahugurwa abategurira kujya mu cyiciro cy'abofisiye bato, bahawe ibihembo na Minisitiri w'intebe Dr Edouard Ngirente, ni igitsina gore.

Umwe muri bo,  AIP Yvette Mutabazi, uvuga ko icyo ari ikimenyetso cy'uko abagore n'abakobwa bashoboye.

Jean Pierre Kagabo