Abarokotse Jenoside mu Majyepfo barishimira ubuvuzi bahabwa ku nkunga ya FARG

Abarokotse Jenoside yakorewe Abatutsi bo mu Ntara y'Amajyepfo ikabasigira ibikomere byabaye intandaro y'indwara zidakira, baravuga ko inkunga bahabwaga na FARG mu kwivuza yabafashije gukurikiranira hafi ubuzima bwabo.

Aho RBA yageze ni mu rugo rwa Nyiraneza Anisie, umupfakazi wasizwe iheruheru na Jenoside yakorewe Abatutsi, atuye  mu kagali ka Gatoki  mu Murenge wa Save mu karere ka Gisagara. 

Nyuma ya Jenoside Nyiraneza yaje gufatwa n'uburwayi budakira, yagerageje kwivuriza mu mavuriro mato ariko biranga biba iby'ubusa.

Nyiraneza ubuhamya bwe ku ndwara zidakira abusangiye n’ababyeyi b'intwaza barwaye indwara zidakira batewe na Jenoside, nabo bashima ubuyobozi bw'igihugu ku nkunga yo kwivuza bahabwa.

Perezida wa Sena, Dr Iyamuremye Augustin avuga ko leta izakomeza kuba hafi abarokotse Jenoside yakorewe Abatutsi mu bishoboka byose, kugira ngo babeho mu buzima bwiza.

Ikigega cya Leta gitera inkunga abacitse ku icumu rya Jenoside batishoboye, FARG mu myaka isaga  23 cyari kimaze, cyakoresheje miliyari zisaga 336 Frw.

Freddy Ruterana