Abaturage barishimira ibikorwa remezo bituma bizihiza neza iminsi mikuru

Bamwe mu baturage batuye mu mujyi wa Kigali ndetse n'abanyarwanda baba mu mahanga baravuga ko uyu mwaka ubasigiye ibikorwa remezo bitandukanye bituma baryoherwa n'iminsi mikuru isoza umwaka.

Bavuga ko amahoteli ndetse n'amazu manini y'ubucuruzi yatashywe muri uyu mwaka wa 2016 yaberetse ko ubuyobozi bwabo bubitayeho.

Benshi bemeza ko uyu mwaka w'2016 ushobora kub ariwo mwaka usize umujyi wa Kigali ndetse n'u Rwanda muri rusange bimaze gufata umuvuduko nyawo w'iterambere.Ibi barabishimangira bashingiye ku bikorwa remezo byafunguye byatangiye gukoreshwa uyu mwaka.

Ibi birimo inyubako ndende z'ubucuruzi ndetse n'imihanda igezweho.

Mu minsi mikuru ya noheli n'ubunani abatuye Kigali babonye aho bisanzurira cyane ugereranije n'imyaka yatambutse.

Ibi bikorwa bitandukanye bituma abanyarwanda batifuza kujya kwizihiriza iminsi mikuru hanze y'igihugu,kuko n'abatuye i mahanga bahitamo kuza kwizihiriza iyi minsi mikuru mu Rwanda.