Abaturiye umuhanda Kayonza-Rusumo barasaba gukemurirwa ibibazo by’ingurane batahawe

Abaturiye umuhanda Kayonza-Rusumo mu Ntara y’Iburasirazuba, barasaba ko inzego zibishinzwe zakemura ibibazo by’ingurane batahawe, ubwo bangirizwaga imitungo mu ikorwa ry’uwo muhanda. 

Ubuyobozi bw’ikigo cy’igihugu gishizwe iterambere ry’ubwikorezi, bwo bwavuze ko hari abatinda kwishyurwa kubera kutuzuza ibyangombwa bisabwa, ariko bakaba bazishyurwa umuhanda wararangiye.

Mu baturiye umuhanda Kayonza-Rusumo cyangwa bari bahafite ibikorwa, bavuga ko bagizweho ingaruka n’ikorwa ryawo, amajwi yumvikana ni ay’abangirijwe inyubako n’abaranduriwe ibihingwa. 

Bose icyo bahurizaho ni uko batahawe ingurane ikwiye bakaba bifuza ko ibibazo byabo byasuzumwa dore ko bimaze igihe kirekire.

Ingaruka z’ikorwa ry’umuhanda Kayonza Rusumo zanageze ku bafite ibikorwa by’ubuhinzi mu bishanga bikikije icyo gishanga, na n’ubu imyaka ikaba ibaye 3 batarishyurwa.

Umuyobozi mukuru wungirije w’ikigo cy’igihugu gishizwe iterambere ry’ubwikorezi, Baganizi Patrick Emile avuga ko kwishyura abangirijwe imitungo n’ikorwa ry’imihanda bigenda bikorwa hagendewe ku bujuje ibisabwa no ku ngaruka zigenda zigaragara.

Umuhanda Kayonza-Rusumo ufite uburebure bwa kilometero 90, ukaba wararangiye gukorwa mu mwaka wa 2020, igisigaye kuri uwo muhanda ni ugushyiraho amatara awumurikira nabyo bikaba bigana ku musozo.

John Bicamumpaka