Abatuye i Gicumbi babangamiwe n’ubujura bw’insinga z’amashanyarazi

Abaturage bo mu Murenge wa Kageyo mu Karere ka Gicumbi, barasaba ubuyobozi ko bwabafasha gukemura ikibazo cy’ubujura bw’insinga z’amashanyarazi gikomeje kugaragara mu Murenge wabo.

Ikindi abaturage bibaza ni uko n’iyo hagizwe abafatirwa muri ubu bujura, ngo bahita barekurwa nta butabera bubonetse.

Mu Mudugudu wa Musetsa mu Kagari ka Horezo mu Murenge wa Kageyo, ni hamwe mu hibasiwe n’ubu bujura bw’insinga z’amashanyarazi.

Aba baturage bavuga ko ubu bujura bw’insinga z’umuriro w’amashanyarazi bubibasiye, bukomeje kubatera ibihombo mu buryo butandukanye no kubadindiza mu iterambere, bakifuza ko ubuyobozi bwagira icyo bukora kugira ngo bufashe aba baturage dore ko ngo hari n’igihe babona bamwe mu bafatirwa muri ubu bujura bahita barekurwa nta butabera bubayeho.

Umuyobozi w’Akarere ka Gicumbi, Ndayambaje Felix avuga ko iki kibazo cy’ubujura bw’insinga z’amashanyarazi bumaze iminsi buvugwa mu Murenge wa Kageyo, ubuyobozi bwakimenye kandi ko harimo gukorwa ibishoboka byose ngo abari inyuma y’ibi bikorwa bamenyekane.

Herman Ndayisaba