Abatuye mu mijyi ya Rubavu na Goma barifuza ko inzitizi ziri mu bucuruzi bwambukiranya imipaka zakurwaho

Abatuye mu mijyi ya Rubavu na Goma batangaje ko bifuza ko inzitizi ziri mu bucuruzi bwambukiranya imipaka zakurwaho imipaka igakora amasaha yose, ndetse n’abaturage bakambuka bakoresheje irangamuntu changwa jeto.

Ubuyobozi w’imiyi yombi bwagaragaje ko ibibazo bihari bizaganirwaho mu biganiro bitangira kuri uyu wa mbere i Kigali hagati y'impande zombi.

Mu gihe ubucuruzi bwambukiranya imipaka ihuza Gisenyi na Goma burimo kuzahuka nyuma yuko bwari bwarasubijwe inyuma n’icyorezo cya Covid-19, abakoresha iyi mipaka bagaragaza ko kuba kwambuka bisaba gukoresha gusa urupapuro rw’inzira rwa Laissez passez na passport ndetse imipaka ntikore amasaha yose ari inzitizi  bifuza ko zikurwaho.

Ibi bibazo biteganijwe kuganirwaho mu nama y’iminsi itatu kuri uyu wa Mbere i Kigali, izahuza intumwa za Repubulika iharanira Demokarasi ya Kongo n'u Rwanda.

Umuyobozi w’Umujyi wa Goma, Makosa Kabeya Francois wanyuze mu mujyi wa Rubavu abanza kubonana na mugenzi we mbere yo kwerekeza muri iyi nama, yavuze ko ibibazo abaturage bagaragaza byashyikirijwe inzego zibishinzwe hategerejwe igisubizo.

Umuyobozi w’Akarere ka Rubavu, Kambogo Ildephonse avuga ko muri ibyo biganiro hari icyizere ko bizafatirwamo imyanzuro ishobora gukuraho inzitizi zose zikoma mu nkokora ubucuruzi nyambukiranyamipaka hagati y'ibihugu byombi.

Ubusanzwe mbere ya Covid-19, abambukaga imipaka yombi ihuza Gisenyi na Goma bari hafi ibihumbi 70 ku munsi, ariko bitewe n’inzitizi zihari, harambuka ababarirwa mu ibihumbi 14.5 ku munsi.