Abiga GS Marie Merci-Kibeho basabwe kugendera kure abashaka kubashora mu macakubiri ahembera ingengabitekerezo ya Jenoside

Mu karere ka Nyaruguru habaye igikorwa cyo kwibuka abari abanyeshuri biciwe muri GS Marie Merci-Kibeho mu karere ka Nyaruguru, abanyeshuri bahiga kuri ubu basabwa kugendera kure abashaka kubashora mu macakubiri n'urwango bihembera ingengabitekerezo ya Jenoside.

Mu mwaka wa 1994 mu kwezi kwa Kabiri kuri iki kigo cya GS Marie Merci-Kibeho, habaye imyigaragambyo y'abanyeshuri bituma ubuyobozi bufata umwanzuro wo guhagarika amasomo basubira iwabo.

Nyuma mu kwa Gatatu ubuyobozi bwaje gusaba abanyeshuri kugaruka kwiga , Jenoside ibasanga ku ishuri abanyeshuri batangira kubavangura.

Mutiganda Innocent, umwe mu barokokeye kuri iri shuri avuga bakorewe ubwicanyi n'abari bashinzwe kubarinda.

Gusa ngo n'ubwo abicanyi bari bafite umugambi wo kubarimbura hadasigaye n'umwe, ngo hari abarokotse kandi banga guheranwa n'amateka, kuri ubu ngo bariyubatse.

Umuyobozi wa Ibuka mu karere ka Nyaruguru, Muhinzi Bertin asaba urubyiruko cyane cyane abakirimo kwiga kugendera ku nama nziza bahabwa n'ubuyobozi, bakirinda uwari we wese washaka kubashora mu macakubiri n'urwango bihembera ingengabitekerezo ya Jenoside.

Aha kuri GS Marie Merci-Kibeho hiciwe abanyeshuri b'Abatutsi basaga 100.