Abikorera muri Kigali barishimira ko imibare y'abandura COVID-19 igenda igabanuka

Bamwe mu bikorera mu mujyi wa Kigali, batangaje ko bishimira uburyo imibare y'abandura icyorezo cya COVID-19 igenda igabanuka, bakaba bafite icyizere ko ubuzima bushobora kongera gusubira mu buryo bakongererwa amasaha yo gukora ndetse n'imirimo itandukanye igakomorerwa.

Igabanuka ry'imibare y'abandura icyorezo cya COVID-19 riraha icyizere abikorera, ko ibikorwa by'ubucuruzi bishobora kongererwa amasaha yo gukora ndetse hakongerwa n'umubare w'abitabira imihango itandukanye nkuko bamwe muri abo babivuga.

Habimana Monfort umwe mu bashoferi batwara abarwaye ba COVID mu mbangukiragutabara, avuga ko umubare w'ingendo yakoraga atwara abarwayi zagabanutse cyane, bigaragaza igabanuka ry'ubwandu.

Umuyobozi w'ibitaro bya Kanyinya byita ku barwayi ba COVID-19, Dr. Cyprien Iradukunda avuga ko kuri ubu bafitemo abarwayi 10 gusa bavuye kuri 45 bari bafite tariki 1 Mutarama uyu mwaka.

Imibare yatangajwe na Minisiteri y'Ubuzima ku wa Kabiri tariki 25 Mutarama uyu mwaka, yerekana ko ibipimo byafashwe bigera ku bihumbi 13,158 hagaragayemo abanduye 173,  ku buryo ubwandu buri ku kigero cya 1.3%.

Ni mu gihe tariki ya 1 uku kwezi hari hafashwe ibipimo ibihumbi 11,075, hagaragaramo abanduye 928 ku kigero 8.4% cy'ubwandu.

Betty Mutoni