Ambasaderi w’u Buyapani yasezeye kuri Minisitiri w’Intebe

Minisitiri w’intebe Dr Edouard Ngirente yakiriye mu biro bye Ambasaderi w’u Buyapani mu Rwanda ucyuye igihe, Masahiro IMAI, bagirana ibiganiro byibanze ku mubano w'ibihugu byombi ndetse n’iterambere ry'imishinga bihuriraho.

Ambasaderi w’u Buyapani mu Rwanda Masahiro Imai yari aje gusezera kuri Minisitiri w’Intebe Dr Edouard Ngirente. Mu biganiro bagiranye bagarutse ku mubano w’ibihugu byombi ndetse n’imishinga bizakomeza gufatanyamo.

Umunyamabanga wa Leta muri Minisiteri y'Ububanyi n'Amahanga Prof Nshuti Manasseh yavuze ko ubu bufatanye bugiye gukomereza no mu bijyanye n’isoko ry’imari n’imigabane u Rwanda rugurisha impapuro z’agaciro z'u Rwanda mu Buyapani.

Mu 2020 ni bwo Ambasaderi Masahiro Imai yashyikirije umukuru w’igihugu impapuro zimwemerera guhagararira igihugu cye mu Rwanda. Avuga ko nk’umuntu wari usanzwe mu nzego z’abikorera mu Buyapani azakomeza gukora ubuvugizi ku mishinga u Buyapani bwakorera mu Rwanda.

                                    Ambasaderi w’u Buyapani ucyuye igihe, Masahiro Imai yasezeye kuri Minisitiri w’Intebe, Dr Ngirente Edouard