Bamwe mu banyamahanga baje kwiga Kaminuza mu Rwanda bashimye umutekano uhari

Bamwe mu banyamahanga baje kwiga mu mashuri makuru na Kaminuza mu Rwanda, baravuga ko umutekano, ireme ry'uburezi riri ku rwego rwiza ari kimwe mu bibakurura kuza kwiga mu Rwanda.

Mangala Mwinja Assiati avuka muri Repubulika Iharanari Demokarasi ya Kongo, ni umwe mu banyeshuri hafi ibihumbi 2 bo hanze y' u Rwanda biga muri Kaminuza yigenga ya Kigali, ndetse atuye hafi y'iyi Kaminuza.

Avuga ko umutekano, ireme ry'uburezi ndetse n'urugwuro by'abanyarwanda ari bimwe mu byatumye aza kuminuriza mu Rwanda.

Usibye imyigishiriza myiza kandi ihamye ndetse n'umutekano uri mu Rwanda, abanyamahanga biga mu Rwanda bashima ko ari n’ahantu wakwiga ukora bigatuma ushobora kwibeshaho.

Ubuyobozi bwa zimwe muri Kaminuza zo mu Rwanda bugaragaza ko aho u Rwanda rugeze rwiyubaka mu nzego zose biri mu bituma aba banyamahanga biyongera gusa ubu nabo bafashe ingamba zituma barushaho kwiyongera.

Inama y'igihugu y'amashuri makuru na za Kaminuza igaragaza ko buri mwaka umubare w'aba banyeshuri wiyongera ubu hakaba harabarurwa abarenga ibihumbi 5.

Ibi kandi biniyongera kuba Rwanda rwarayobotswe na Kaminuza Mpuzamahanga zifite amashami mu Rwanda nka Canergie Melon University, African Leadership Universty n'izindi.

Fiston Felix Habineza